رؤيتى الشخصية لرئيس مصر القادم !!

رؤيتى الشخصية لرئيس مصر القادم !!
___________________
أولاً : تعالوا نفترض احتمالات للمرشحين أو بمعنى أصح المتاحين, ونمسك واحد واحد

أحمد زويل :
... أنا شخصيا نفسى الراجل ده يمسك البلد دى وهصوتله بالعشرة
حد دلوقتى يرد و يقولى : يا عم ده عالم ملوش غير فى الابحاث وعايش بره مصر
أرد و أقوله : وجهة نظرى ان بلدنا دلوقتى محتاجة للعلم فى كافة المجالات , لأنه هيهأ المناخ للعلماء و المفكرين و المبدعين , والعلم هم اساس التقدم
و زى ما بيقولوا :
" العلم يرفع بيوتاً لا اساس لها..........و الجهل يهدم بيوت العز و الشرف "
و على فكرة الكيان الصهونى لما أسس دولته , عرض على العالم اليهودى بين قوسين الرائع " اينشاتين " انه يبقى رئيس لاسرائيل,,,,, بالرغم انه كان عالم ملوش علاقة غير بالنظريات وبعيد تماما عن بؤرة
الصراعات !!

عمرو موسى :
راجل محترم معروف بموافقه أثناء الانتفاضة الفلسطينية و وزير خارجية محنك , و يمكن شوية أتردم عليه التراب واتحول لموظف فى الجامعة العمالية قصدى الجامعة العربية
بس أنا شايف انه مش هيقدم فكر جديد لو بأة ريس لأن شئون البلد الداخلية دلوقتى مش فى حاجة للسياسة بقدر ما هى محتاجة لتهيئة مناخ للعلم و الفكر و التقدم و الاستثمار و الاقتصاد و الأفكار التقدمية

عمر سليمان :
راجل محترم و شخصية نظيفة برغم ان مبارك حرقه فى وقت مش مناسب
لكن برضو بأكد ان البلد دلوقتى عايزة حكم مدنى مختلف عن حكم العسكر.....عايزين أفكاااااااار تقدمية !!

البرادعى :
أنا شايف انه راجل طيب , أخره يلبس جلابية بيضة , و يقعد قدام دكان , ويرش شوية مية قدام الدكان

أيمن نور و حمدين صباحى وحمادة هلال و ما شابه ذلك :
طيب ما ارشح نفسى أنا كمان !! ^^
بصرف النظر عن شخصياتهم و فكرهم اللى أنا معرفوش ,,, بس أنا شايف أن بلدنا أكبر من كدة بكتير

أحمد شفيق :
أنا نفسى الراجل ده يفضل " رئيس للوزراء " ,,,, لأنه شخصية محترمة و منظمة و بسيطة و محبوبة وشكله عايز يشتغل بجد و واثق فى نفسه......ياريت نديلوا فرصتوه يا جماعة
أول مرة فى حياتى أشوف رئيس وزراء مصرى محبوب و عنده كاريزما !!
موت من الضحك لما سمعته بيتكلم عن أحمد زكى بدر " وزير التعليم "
قالك : أحمد زكى بدر شخصية مش محبوبة ومش بيعرف بيتعامل مع الناس بس لو اتزنقت فيه هجيبه ههههههههههههههه....أنا لو مكان أحمد زكى بدر بعد الكلمتين دول , وقالى تعالى امسك الوزارة هتف فى وشه ههههههههههههه

خلاصة الكلام : أنا بتمنى أشوف أحمد زويل رئيس للجمهورية !!! ,,,, وأحمد شفيق رئيس للوزراء
ومعنديش مشاكل ان مصر تبقى دولة برلمانية !!